Mánuður: ágúst 2012

Strákarnir í roki og rigningu

Gæðum heimsins er greinilega misskipt. Hér norðan heiða þrá menn rigningu en líklega hafa keppendur GSS í sveitakeppni karla fengið nóg af henni í Hveragerði um helgina.

Hér á eftir er stutt lýsing á sveitakeppninni þetta árið.

Golfklúbbur Sauðárkróks sendi karlasveit til keppni í Sveitakeppni GSÍ 4. deild sem haldin var á Gufudalsvelli í Hveragerði dagana 10.-12.ágúst s.l.  Fyrir klúbbinn fóru þeir Arnar Geir Hjartarson, Brynjar Örn Guðmundsson, Ingvi Þór Óskarsson, Jóhann Örn Bjarkason, Oddur Valsson og Thomas Olsen.  Í 4. deildinni er spiluð holukeppni og 3 leikir í hverri umferð. Einn fjórmenningur og tveir tvímenningsleikir. Í deildinni voru 8 lið og leikið var í tveimur riðlum. Sveit GSS var í B riðli ásamt Golfklúbbi Selfoss, Golfklúbbnum Geysi og Golfklúbbnum Tudda.  Allar veðurspár rættust því miður og mikið rok og vatnsveður var allan föstudaginn. Fyrri leikurinn á föstudeginum var á móti Golfklúbbnum Geysi.  Ingvi Þór og Brynjar Örn spiluðu fjórmenninginn en Jóhann Örn og Arnar Geir spiluðu tvímenningsleikina. Jóhann Örn sigraði í sínum leik 4/3 en Arnar Geir tapaði 3/2. Öllu meiri spenna var í fjórmenningsleiknum sem tapaðist á 20.holu eða 2. holu í bráðabana. Byrjunin ekki alveg eins og  vonast var eftir.  Seinni leikurinn á föstudeginum var gegn Golfklúbbnum Tudda. Í fjórmenningnum þar léku þeir Arnar Geir og Ingvi Þór en í tvímenningsleikjunum spiluðu þeir Jóhann Örn og Oddur. Úrslitin í þessum leik urðu þau að Arnar Geir og Ingvi Þór sigruðu 5/3 og Oddur sigraði einnig örugglega 5/3 í sínum leik. Öllu meiri spenna var í leiknum hjá Jóhanni og veðrið var orðið afleitt á þessum tíma og völlurinn gjörsamlega óleikhæfur.  Leik var hætt eftir 15 holu og þá var jafnt.  Ekki slotaði veðrinu um nóttina og leik var aflýst á laugardeginum.  Á sunnudeginum var komið aðeins skaplegra veður þó að ennþá rigndi en vindurinn hafði þó minnkað. Það var því tekin ákvörðun um að ljúka keppni en til að það væri hægt þá voru leikirnir styttir úr 18 holur og niður í 9 holur. Fyrst þurfti að byrja á því að klára leikinn frá föstudeginum.  Jóhann Örn sýndi mikla hörku og landaði sigri í þessum leik á 3. holu í bráðabana eða þeirri 21. Það unnust því allir leikirnir í 2. umferðinni. Þá tók við leikur á móti Golfklúbbi Selfoss.  Í fjórmenningnum þar léku þeir Arnar Geir og Ingvi Þór en í tvímenningsleikjunum spiluðu þeir Jóhann Örn og Oddur. Úrslitin í þessum leik urðu þau að Arnar Geir og Ingvi Þór sigruðu 1/0. Jóhann Örn tapaði 2/0. Mikil spenna var í leiknum hjá Oddi en hann tapaðist á 2. holu í bráðabana.  Eftir þessa niðurstöðu var ljóst að fallbarátta blasti við og spila þurfti við Golfklúbb Bolungarvíkur um hvort liðið félli í 5.deild. Í fjórmenningnum þar léku þeir Arnar Geir og Ingvi Þór en í tvímenningsleikjunum spiluðu þeir Jóhann Örn og Brynjar Örn. Úrslitin í þessum leik urðu þau að Arnar Geir og Ingvi Þór sigruðu 1/0, Jóhann Örn sigraði 3/2 í sínum leik en Brynjar Örn tapaði 1/0. Næsta verkefni var því að spila við Golfklúbbinn Hamar á Dalvík um 5.sætið í deildinni. Í fjórmenningnum spiluðu Thomas og Oddur, en í tvímenningsleikjunum þeir Brynjar Örn og Jóhann Örn. Ekki kom til þess að Jóhann Örn spilaði því mótherji hans gaf leikinn. Thomas og Oddur töpuðu 2/1, Brynjar Örn tapaði 2/0. Niðurstaðan varð því 6.sæti þetta árið.  Keppninnar verður fyrst og fremst minnst fyrir hið gríðarlega vatnsveður sem keppendur lentu í sem gerði þeim erfitt fyrir, en það fer bara í reynslubankann eins og annað mótlæti. Hins vegar er bara hægt að bretta upp ermar og koma enn sterkari til leiks á næsta ári.

Categories: Óflokkað

Kvennasveit GSS sigrar í annari deild

Kvennasveit GSS 2012

Sveit GSS sigraði glæsilega í annari deild Íslandsmótsins og vann sér þar með rétt til að keppa í hópi þeirra sterkustu á næsta ári. Keppnin í annari deild fór fram á Ólafsfirði og var keppt í höggleik.
Sveit GSS sigraði á 662 höggum. Sveit Golfklúbbsins Odds í Garðabæ varð í öðru sæti á 665 höggum og fylgdi GSS upp í fyrstu deild. í þriðja sæti varð síðan sveit Golfklúbbsins Leynis á Akranesi á 675 höggum. Sveit GSS skipuðu þær Árný Lilja Árnadóttir, Dagbjört Hermundsdóttir, Ragnheiður Matthíasdóttir, Sigríður Eygló Unnarsdóttir og Sigríður Elín Þórðardóttir. Konurnar spiluðu gott og jafnt golf um helgina sem skilaði þeim þessum frábæra árangri. Óskum við þeim kærlega til hamingju með árangurinn.

Categories: Óflokkað

Sveitakeppni GSÍ fer fram um helgina

Golfklúbbur Sauðárkróks sendir lið í sveitakeppni GSÍ en keppnin fer fram nú um helgina. Karlasveitin fer í Hveragerði til keppni í 4. deild. Í sveitinni eru þeir Arnar Geir Hjartarson. Brynjar Örn Guðmundsson, Ingvi Þór Óskarson, Jóhann Örn Bjarkason, Oddur Valsson og Thomas Olsen. Kvennasveitin fer til Ólafsfjarðar og keppir í annari deild. Sveitina skipa Árný Árnadóttir, Dagbjört Hermundardóttir, Ragnheiður Matthíasdóttir, Sigríður Elín Þórðardóttir og Sigríður Eygló Unnarsdóttir.

Klúbbmeistararnir Árný Lilja og Arnar Geir verða bæði í sveitum GSS á Íslandsmótinu.

 

Categories: Óflokkað