Golfklúbbur Sauðárkróks

Jóhann Örn Bjarkason tilnefndur sem íþróttamaður Skagafjaðrar

GSS — Fri, 30 Dec 2011 11:08:13 +0000

Aldís Ósk Unnarsdóttir og Hlynur Freyr Einarsson voru tilefnd sem efnilegir íþróttamenn.

Við athöfn í gærkvöldi var tilkynnt hver hlyti titilinn íþróttamaður Skagafjarðar 2011. Meðal þeirra sem tilnefndir voru var Jóhann Örn Bjarkason kylfingur. Hann átti gott golfár og hefur aldrei verið betri. Íþróttamaður ársins í Skagafirði var valinn Elvar Einarsson hestamaður á Syðra-Skörðugili og er hann vel að titlinum kominn.

Á samkomunni fengu einnig ungir og efnilegir íþróttamenn viðurkenningu og voru þau Hlynur Einarsson og Aldís Ósk Unnarsdóttir tilnefnd af hálfu Golfklúbbsins.

Gleðileg jól

GSS — Fri, 23 Dec 2011 16:13:21 +0000

Golfklúbbur Sauðárkróks óskar öllum Skagfirðingum og öðrum velunnurum
gleðilegra jóla og farsældar á komandi ári.

Skötuveisla GSS 2011

GSS — Tue, 20 Dec 2011 09:04:42 +0000

Komdu og fáðu nasaþefinn af jólunum á Kaffi Krók Föstudaginn, 23. desember 2011, frá kl. 11:00 – 14:00

Þá er að renna í garð þessi yndislegi tími ársins þar sem heimilin fyllast af allskonar ilmi sem við tengjum öllu jöfnu við jólin.

Til að afla tekna hefur GSS ákveðið í samstarfi við velunnara okkar Kaffi Krók, sem m.a. hefur stutt dyggilega við mótaröðina okkar undanfarin sumur, að blása til stórfenglegrar skötuveilslu! Við höldum í fornar hefðir og bjóðum Skagfirðingum og gestum þeirra nær og fjær að hittast og borða saman þennan þjóðlega rétt, auk þess sem boðið verður upp á síld, saltfisk, skötustöppu, saltfiskstöppu, rúgbrauð, smjör, hamsa, kartöflur og vestfirzkan hnoðmör, svo maður tali nú ekki um ilmandi grjónagraut, fyrir aðeins kr. 2.800.pr.mann.
Einnig er hægt að kaupa bjór, gos og snapsa af ýmsi tagi!
Nauðsynlegt er að panta borð skrá sig í matinn sem fyrst í síma: 845-6625 eða á videosport@simnet.is

Almennur félagsfundur

GSS — Fri, 09 Dec 2011 16:05:37 +0000

Ágætu félagar,

Stjórn Golfklúbbs Sauðárkróks boðar til almenns félagsfundar í Safnahúsinu Sauðárkróki sunnudaginn 12.desember nk. kl.14.

Umræðuefni er inniaðstaða til golfþjálfunar. Hvetjum sem flesta félaga til að mæta!

Góður rekstur GSS

GSS — Mon, 28 Nov 2011 15:05:01 +0000

Aðalfundur Golfklúbbs Sauðárkróks var haldinn að Hlíðarenda 24. Nóvember. Þar kom fram að rekstur klúbbins hefur verið ágætur á síðasta ári, en klúbburinn skilaði ríflega 3 milljónum í hagnað. Rekstrartekjur námu tæplega 22 milljónum króna og gjöld voru um 19 milljónir.

Frá aðalfundi GSS 2011

Langtímaskuldir klúbbsins eru ríflega 3 milljónir króna. Hins vegar blasir við að nauðsynlegt verður að endurnýja sláttuvél á næstunni og er áætlaður kostnaður um eða yfir 10 milljónir króna og því mikilvægt að greiða niður skuldir til að mæta framtíðarútgjöldum.

Á síðasta ári var unnið að ýmsum framkvæmdum, m.a. var bætt við vatnssöfnunartank á golfsvæðið, settar upp öryggismyndavélar og byggð upp ný flöt á 9. braut. Félagsmenn lögðu á sig mikla sjálfboðavinnu til að framkvæmdir yrðu sem ódýrastar og hafa tugir sjálfboðaliða lagt mikið á sig fyrir klúbbinn á árinu.

Allir stjórnarmeðlimir gáfu kost á sér til áframhaldandi stjórnarsetu, nema Bjarni Jónasson form.mótanefndar og mun stjórn klúbbsins næsta starfsár því vera þannig skipuð: Pétur Friðjónsson formaður, Unnar Ingvarsson varaformaður, Dagbjört Rós Hermundardóttir ritari, Ragnheiður Matthíasdóttir gjaldkeri, Björn Sigurðsson, Hjörtur Geirmundsson og Sigríður Elín Þórðardóttir.

Bjarna eru þökkuð verkin á liðnu ári og Sigríður Elín er boðin velkomin til starfa í stjórn. Hægt verður að nálgast ársreikninginn á www.gss.is .

Aðalfundur Golfklúbbs Sauðárkróks

GSS — Thu, 17 Nov 2011 10:32:28 +0000

Aðlfundur Golfklúbbs Sauðárkróks verður haldinn fimmtudaginn 24.nóvember n.k. kl.20.00 á Hlíðarenda.

Fundarefni:

1. Skýrsla stjórnar og nefnda.

2. Endurskoðaðir reikningar lagðir fram

3. Lagabreytingar

4. Kosning stjórnar og varamanna

5. Kosning í aðrar nefndir samanber 9.gr.

6. Kosnir tveir endurskoðendur og tveir til vara

7. Kosning fulltrúa á Golfþing G.S.Í. og þing U.M.S.S.

8. Ákvörðun félagsgjalda

9. Önnur mál

Félagar eru hvattir til að bjóða sig fram til starfa fyrir klúbbinn á næsta starfsári.

Allir á dekk

GSS — Fri, 30 Sep 2011 11:06:47 +0000

Nú er aðeins endahnykkurinn eftir við að ljúka 9 flötinni. Hins vegar vantar vinnufúsar hendur til að svo megi verða. Þess vegna er óskað eftir sjálfboðaliðum frá kl. 15:00 í dag og á morgun frá um 8 eða 9 og þangað til verkinu lýkur. Um er að ræða að raka til mold (og garðhrífur því mikilvægar) og síðan þökulagning í fyrramálið. Sumsé allir upp á dekk sem vettlingi geta valdið.

Úrslit í Norðvesturþrennunni

GSS — Thu, 22 Sep 2011 08:52:38 +0000

Nú er búið að taka saman úrslit í hinni árlegu Norðvesturþrennu, sameiginlegri golfmótaröð golfklúbbanna á Norðurlandi vestra. Um er að ræða Golfklúbbinn á Sauðárkróki, Golfklúbb Skagastrandar og Golfklúbbinn Ós á Blönduósi. Keppt er einu sinni á hverjum velli og í heildarkeppninni eru lagðir saman punktar keppenda úr hverju móti fyrir sig.

Fyrsta mótið fór fram á Skagaströnd á Þjóðhátíðardaginn 17. júní, annað mótið var um verslunarmannahelgina á Hlíðarendavelli og það þriðja þann 20. ágúst á Blönduósi. Samtals tóku tæplega 90 keppendur þátt í mótunum þremur.

Að vanda stóðu keppendur GSS sig með sóma þar sem Sigríður Elín hafði sigur í kvennaflokki án forgjafar og Einar Einarsson lenti í öðru sæti bæði í opnum flokki með forgjöf og í karlaflokki án forgjafar.

Haraldur Friðriks lenti svo í þriðja sæti í sama flokki. Úrslit urðu sem hér segir:

Opinn flokkur með forgjöf:

Jón Jóhannsson GÓS 100 punktar

Einar Einarsson GSS 99 punktar

Sigríður Elín Þórðardóttir GSS 90 punktar

Kvennaflokkur án forgjafar:

Sigríður Elín Þórðardóttir GSS 51 punktur

Guðrún Ásgerður Jónsdóttir GÓS 50 punktar

Jóhanna Guðrún Jónsdóttir GÓS 29 punktar

Karlaflokkur án forgjafar:

Jón Jóhannsson GÓS 73 punktar

Einar Einarsson GSS 71 punktur

Haraldur Friðriksson GSS 71 punktur

Breytingar á Hlíðarendavelli

GSS — Tue, 20 Sep 2011 16:15:15 +0000

Varla hefur farið framhjá glöggum kylfingum að miklar framkvæmdir standa nú yfir við 9. flöt vallarins. Verið er að vinna að uppbygginu á nýrri flöt, en sú gamla hefur verið nær ónýt vegna kalskemmda síðustu ár. Vallarnefnd lagði til að byggð yrði upp ný flöt og stjórn samþykkti framkvæmdirnar sem verður að mestu lokið nú á haustdögum. Líklega verður hægt að spila inn á nýju flötina síðla næsta sumar, en gamla flötin verður í notkun þangað til.

Unnar sigrar í holukeppninni.

GSS — Tue, 20 Sep 2011 16:04:05 +0000

Nú nýverið lauk keppni í holukeppni, en að þessu sinni var keppt með forgjöf. Alls hófu 32 keppendur leik og var um úrsláttarfyrirkomulag að ræða. Til úrslita kepptu Sigríður Elín Þórðardóttir og Unnar Ingvarsson og fóru leikar svo að Unnar sigraði 5/4 og er því klúbbmeistari GSS árið 2011.