Höfundur: Hjörtur Geirmundsson

Aðalfundur GSS 2019

Aðalfundur GSS 2019 var haldinn í golfskálanum á Hlíðarenda Sauðárkróki mánudaginn 25. nóvember.

Stjórn GSS árið 2020 verður óbreytt frá 2019:  Kristján Bjarni Halldórsson formaður, Halldór Halldórsson varaformaður, Kristján Eggert Jónasson gjaldkeri, Dagbjört Rós Hermundsdóttir ritari, Guðmundur Ágúst Guðmundsson (formaður vallarnefndar), Andri Þór Árnason (formaður mótanefndar) og Helga Jónína Guðmundsdóttir  (formaður unglinganefndar). Vallarstjóri er Guðmundur Þór Árnason. 

Á aðalfundinum var samþykkt lagabreyting um breytt nafn klúbbsins og heitir hann nú Golfklúbbur Skagafjarðar en hét áður Golfklúbbur Sauðárkróks. Áfram verður notuð þrístöfunin GSS. 

Í ársskýrslu 2019 kemur fram að mikil gróska er í starfinu, ekki síst í barna og unglingastarfi. 

Félagsmenn eru nú 167 talsins en voru 154 í lok árs 2018.  Nýliðanámskeið hafa notið vinsælda og eru nýir félagar ætíð velkomnir. Nefndir GSS 2020 eru vel mannaðar og var skemmtinefnd klúbbsins endurvakin.

GSS gegnir mikilvægu hlutverki í ferðaþjónustu og heilsueflandi samfélagi í Skagafirði. 

Hlíðarendavöllur er stolt félagsmanna, 29 hektarar að stærð innan vallarmarka og þar með stærsta íþróttasvæði Skagafjarðar.  Völlurinn er að jafnaði opinn yfir 150 daga á ári en golftímabilið hefur lengst með hlýnandi veðurfari. 

Starf GSS er allt árið um kring og færist í inniaðstöðu í Borgarflöt yfir köldustu mánuðina. Þar er m.a. golfhermir og púttaðstaða.  

Vallarnefndin hefur lagt fram metnaðarfulla áætlun um viðhald og framkvæmdir á vellinum til næstu ára.  Það þarf talsverða vinnu við að halda vellinum í fremstu röð 9 holu golfvalla á Íslandi. 

Í ársreikningi kemur fram að rekstrarniðurstaða 2019 var neikvæð um 2,2 milljónir eða álíka og árið áður.  Lengt tímabil og aukin starfsemi felur í sér aukinn kostnað. Stjórn GSS vinnur að leiðum til að bæta rekstrarniðurstöðu komandi ára. 

Golfklúbburinn fékk góða gjöf frá dugmiklum eldri félagsmönnum sem reistu og gáfu klúbbnum framtíðaraðstöðu fyrir golfbíl.  Þá var samþykkt að GSS taki við eignum og skuldum hermafélagsins. 

Sigríður Elín Þórðardóttir hlaut háttvísiverðlaun GSÍ. Verðlaunin fær hún fyrir góða framkomu innan sem utan vallar, góða umgengni á vellinum og háttvísi í keppni. Hún spilaði m.a. með kvennaliði GSS í sumar í efstu deild á Íslandsmóti golfklúbba. 

 Í lok fundar var Stefán Pedersen kjörinn heiðursfélagi klúbbsins en hann hefur verið drjúgur við ljósmyndun í þágu klúbbsins í gegnum tíðina auk þess að sýna starfseminni lifandi áhuga og vera nánast hluti af vellinum.

Stjórn Golfklúbbs Skagafjarðar horfir björtum augum til ársins 2020 en þá verður klúbburinn 50 ára.  Framundan eru ýmsir viðburðir í tilefni afmælisins, svo sem afmælisferðir, útgáfa afmælisrits og afmælismót. 

Categories: Félagsstarf

Holukeppnismeistari og lokamót sumarsins

Núna þegar farið er að hausta er ekki úr vegi að fara yfir starfið undanfarnar vikur.

Úrslitin í holukeppni réðust í lok ágúst og var það Rafn Ingi Rafnsson sem er holukeppnismeistari GSS árið 2019. Hann hafði betur í spennandi leik á móti Telmu Ösp Einarsdóttur. Holukeppnin er afar skemmtilegt fyrirkomulag þar sem allir hafa jafna möguleika þar sem full forgjöf er tekin inn í spilið.

Opna Advania var haldið 1. september.  Skemmtilegt mót þar sem fyrirkomulagið var betri bolti.   Sigurvegarar voru þau  Telma Ösp Einarsdóttir og Hjörtur Geirmundsson. 

Advania er eitt af þeim fyrirtækjum sem hafa staðið með okkur að mótahaldi í sumar.  Við í GSS erum afar þakklátt þeim fyrirtækjum sem styrkja okkur með einum eða öðrum hætti.

Barna- og unglingastarfið hefur verið öflugt í sumar.  

Farið var í vel heppnaða skemmtiferð til Akureyrar þann 6. september þar sem börn og foreldrar skelltu sér á skauta, í sund og svo var Pizzuhlaðborð. 
Almenn ánægja var með ferðina og gaman þegar farið er í svona ferðir til að efla andann.

Síðasta mótið í Norðurlandsmótaröðinni var þann 15. september.  GSS átti samtals 9 keppendur á lokamótinu á Akureyri en í mótaröðinni í heild í sumar áttum við 18 þátttakendur.
Keppendur GSS röðuðu sér í verðlaunasæti á lokamótinu:  Telma Ösp var efst í flokki 18-21 árs stúlkna, Hildur Heba Einarsdóttir var í öðru sæti í flokki 15 – 17 ára stúlkna, Anna Karen Hjartardóttir var í öðru sæti í flokki stúlkna 14 ára og yngri. 

Heildarkeppnin kallast Norðurlandsmeistarinn.  Þá er tekin saman besti samanlagður árangur á 3 mótum í sumar, reiknuð stig fyrir hvert sæti. Klúbburinn eignaðist tvo Norðurlandsmeistara þetta árið. Telma Ösp Einarsdóttir varð stigameistari í flokki 18-21 árs stúlka og Anna Karen Hjartardóttir í flokki 14 ára og yngri þar sem hún deildi stigameistaratitlinum með Köru Líf Antonsdóttur úr GA. Hildur Heba Einarsdóttir í 2 sæti í stúlknaflokknum 15-17 ára og Una Karen Guðmundsdóttir var í 3. sæti í sama stúlknaflokki, þ.e. 14 ára og yngri.   Í ár voru það bara stelpurnar okkar sem náðu á pall í heildar mótaröðinni.  Strákarnir voru samt nokkrir nálægt því .

Categories: Óflokkað

Karlasveit GSS í 2.sæti á íslandsmóti golfklúbba 3.deild

Karlasveit GSS 2019

Karlasveit GSS lék á íslandsmóti golfklúbba 3.deild sem haldið var á Húsatóftarvelli í Grindavík 16.-18.ágúst s.l. Sveitina skipuðu þeir Arnar Geir Hjartarson, Brynjar Örn Guðmundsson, Elvar Ingi Hjartarson, Hákon Ingi Rafnsson, Ingvi Þór Óskarsson og Jóhann Örn Bjarkason. Liðsstjóri var Hjörtur Geirmundsson. Fyrirkomulag keppninnar er holukeppni þannig að spilaður er einn fjórmenningur þ.e. tveir saman í liði og slá annað hvert högg. Síðan eru spilaðir tveir tvímenningsleikir þ.e. maður á mann, í hverri umferð.

Á föstudeginum var byrjað á því að spila við Golfklúbb Húsavíkur og vannst sá leikur með 2 vinningum gegn 1. Arnar Geir sigraði 5/3 og Jóhann Örn sigraði 5/4 í sínum tvímenningsleikjum. Fjórmenningur með Ingva Þór og Brynjar Örn tapaði 2/1. Seinni leikur föstudags var gegn Golfklúbbi Borgarness og vannst hann einnig með 2 vinningum gegn 1. Fjórmenningur með Brynjar Örn og Elvar Inga sigraði 1/0, Arnar Geir sigraði 2/0 og Jóhann Örn tapaði 4/3. Að loknum þessum leikjum lá fyrir að GSS yrði í efri hluta deildarinnar, en 8 lið eru í deildinni.

Á laugardeginum var fyrst leikið við heimamenn í Grindavík og tapaðist sá leikur með 2 vinningum gegn 1. Arnar Geir sigraði í sínum leik 8/6, Hákon Ingi spilaði einnig tvímenningsleik og tapaði 3/2. Fjórmenningur með Ingva Þór og Elvar Inga tapaði 1/0. Þá lá það fyrir að seinni leikur á laugardeginum myndi vera við Golfklúbb Fjallabyggðar og réði sá leikur úrslitum um hvort liðið myndi spila til úrslita í deildinni. Skemmst er frá því að segja að strákarnir spiluðu glimrandi vel í þeim leik og sigruðu alla leiki, þ.e. 3 vinningar gegn engum. Fjórmenningur með Brynjar Örn og Ingva sigraði 5/4, Jóhann Örn sigraði 2/1 og Arnar Geir sigraði einnig 2/1. Það var því ljóst við GSS var á leið í úrslitaleikinn á sunnudeginum.

Eins og fyrr segir þá var úrslitaleikurinn á sunnudeginum og þar var aftur leikið við Golfklúbb Húsavíkur. Að þessu sinni voru Húsvíkingar sterkari og sigruðu með 2 vinningum gegn 1 og leika því í 2.deild að ári. Arnar Geir sigraði í sínum leik 2/0, Jóhann Örn tapaði 3/2 og Fjórmenningur Ingva Þórs og Brynjars Arnar tapaði 2/0 í miklum baráttuleik. Golfklúbbur Fjallabyggðar endaði síðan í 3.sæti.

Heilt yfir þá spiluðu strákarnir mjög vel þessa helgi við mjög erfiðar aðstæður, en vindur var mjög mikill alla helgina og völlurinn þurr og harður eftir því. Vissulega hefði verið gaman að landa sigri í deildinni og spila í 2. deild að ári en eins og máltækið segir „Gott silfur er gulli betra!“.

Categories: Afreksstarf