Author: Stjórn GSS

GSS 50 ára 2020

Golfklúbbur Skagafjarðar verður 50 ára árið 2020.  Við viljum sýna okkar bestu hliðar á afmælisári og ýmislegt er á döfinni.  Meðal annars má nefna:

  • Aukin áhersla á barna- og unglingastarf. Á sumrin er æft virka daga í tveimur aldurflokkum og á veturna (janúar – apríl) er æft inni á Flötinni, inniaðstöðu GSS. Við munum halda þessu starfi áfram en viljum bæta í með aukinni aðkomu PGA þjálfara.

  • Útgáfa 50 ára afmælisrits.  Í afmælisritinu verða viðtöl við félagsmenn, saga klúbbsins verður rakin og logo styrktaraðila verða áberandi.  Ritinu verður dreift til félagsmanna, fyrirtækja og stofnana í Skagafirði, auk þess sem ritiið verður gert aðgengilegt rafrænt á heimasíðu okkar og vefsíðunni golf.is sem allir golfarar á Íslandi heimsækja reglulega. 

  • Öflugt mótahald.  Mótahald golfklúbbsins er blómlegt en GSS stóð fyrir 36 golfmótum árið 2019.  Flest þessara móta eru haldin í samstarfi við fyrirtæki og bera heiti fyrirtækisins sem styrkir mótið.  Á afmælisári ætlum við að halda áfram góðu mótastarfi og bæta um betur með veglegu afmælismóti.

  • Endurbætur á vellinum.  Góður golfvöllur er grunnurinn að góðu starfi.  Við erum stolt af vellinum okkar sem er í fremstu röð 9 holu golfvalla á Íslandi.  Við viljum vera í fremstu röð áfram en til þess þarfnast völlurinn stöðugs viðhalds og endurbóta.  Vallarnefnd GSS hefur sett fram metnaðarfulla áætlun um endurbætur vallarins til næstu ára þar sem margt mun koma til framkvæmd á afmælisári 2020.

  • Bætt aðstaða í golfskála.  Golfskálinn er vettvangur þar sem félagar koma saman að loknum góðum hring, þar sem börn og unglingar hafa aðstöðu fyrir og eftir æfingar, þar sem ferðagolfar setjast niður og slaka á í fögru umhverfi og síðast en ekki síst er golfskálinn nauðsynlegur fyrir mótahald.  Skálinn er farinn að láta á sjá og nauðsynlegt að sinna viðhaldi hans.  Þá er orðið löngu tímabært að endurnýja húsgögn.

  • Fjölgun félaga.  Nýliðanámskeið hafa verið vel heppnuð og leitt til fjölgunar félaga í klúbbnum.  Við viljum gera enn betur.  Stefnt er að sérstakri kynningu meðal nýbúa, eldri borgurum verður boðið upp á púttnámskeið og sérstakar kynningar verða í byggðakjörnum utan Sauðárkróks.  Nafni klúbbsins var breytt í nóvember 2019 og heitir hann nú Golfklúbbur Skagfirðinga og leggjum við með því áherslu á að klúbburinn er fyrir alla íbúa Skagafjarðar.

  • Nútímaþjálfun.  Golfþjálfun hefur tekið miklum framförum undanfarin ár.  Þar munar mest um framfarir í golfhermum sem gera kleift að æfa golf allt árið með nákvæmum upplýsingum um boltaflug og sveiflu.  Sífellt fleiri golfklúbbar hafa notfært sér tækniframfarirnar og fjárfest í fullkomnum golfhermum (Trackman).  Við viljum ekki vera eftirbátar öllu lengur og viljum fjárfesta í slíkum hermi.  Nýr golfhermir mun hafa í för með sér betri þjálfun fyrir börn, unglinga og fullorðna félagsmenn GSS.

Starf GSS er fjölþætt og fer vaxandi.  Við viljum nýta tækifærin sem eru fólgin í vaxandi vinsældum golfs á Íslandi, aukinni áherslu á heilsueflingu og hlýnandi veðurfari.  Við sjáum tækifæri til að efla starfsemi GSS á afmælisári með hjálp góðra fyrirtækja.  Við viljum einnig vinna með fyrirtækjum að því að brjóta upp starfið á starfsmannadögum eða skemmtidögum, s.s. með púttmóti eða golfmóti á Hlíðarendavelli eða í inniaðstöðu.  

Categories: Fréttir

Kynningarfundur um stefnu

Kynningarfundur um stefnu og starfsáætlun GSS var haldinn í Fjölbrautaskólanum mánudaginn 18. nóvember. Mæting var góð, full stofa.
Á fundinum var farið yfir stefnu og starfsáætlun næstu árin.

Kynnt var vinna stjórnar við gerð handbókar sem verður kláruð að loknum aðalfundi 2019. Handbókin er ekki síst gagnleg fyrir núverandi og verðandi stjórn og nefndir. Einnig er handbók ein af forsendum þess að GSS geti orðið fyrirmyndarfélag ÍSÍ. Drög að handbókinni er að finna á heimasíðunni og verður fullkláruð handbók einnig sett á heimasíðuna.

Barna- og unglingastarf
Eitt af megin markmiðum GSS er að efla barna- og unglingastarf.  Stefnt er að því að börn og unglingar fái aukinn tíma í þjálfun og að þjálfarar klúbbsins starfi undir leiðsögn PGA kennara sem setur upp æfingaáætlun í samráði við barna- og unglinganefnd.  Einnig er stefnt að aukinni þátttöku barna og unglinga í mótum með áherslu á þátttöku í yngri hópum.  Félagslegi hluti starfsins er mikilvægur og er stefnt að blómlegu félagslegu starfi fyrir börn og unglinga. 
Áhersla 2020:  Æfinga- og skemmtiferð til Danmerkur. 

Mótahald
Stefnt er á að halda árlega a.m.k. 6 opin mót og yfir 20 innanfélagsmót.  Starfa með UMSS að landsmótum.
Áhersla 2020:   Halda veglegt afmælismót GSS.  Þegar hefur verið óskað eftir að halda Íslandsmót karla, 3. deild árið 2020.

Kynning og nýliðun
Nýliðanámskeiðum verður haldið áfram enda hafa þau tekist afar vel.  Áfram verða vanur/óvanur mót eftir nýliðanámskeið og reynt verður að fjölga gullteigamótum.  Heimasíða verður notuð til upplýsingar fyrir félaga og kynningar fyrir áhugasama.  Reynt verður að virkja nýbúa til þátttöku í golfi, með sérstökum kynningum.  Stefnt er að því að stofna púttdeild innan klúbbsins með áherslu á þátttöku fólks 70 ára eða eldri. 
Áhersla 2020:  Gefið verður út afmælisrit GSS í tilefni 50 ára afmælis.  Fá umfjöllun í Golf á Íslandi og á N4.  Rita greinar í Feyki.

Golfskálinn
Stjórn GSS hefur hug á að taka upp viðræður um byggingu fjölnota húsnæðis.  Viðræður við Sveitarfélagið Skagafjörð og ýmsa hagsmunaaðila, t.d. ferðaaðila,  aðildarfélög UMSS og ýmsa aðra klúbba um byggingu fjölnota húsnæðis sem rúmar funda-, veitinga og skrifstofuaðstöðu.  Það er ljóst að slík framkvæmd er ekki á færi golfklúbbsins eins og því þarf að fá fleiri að hugmyndavinnu vegna byggingar slíks fjölnota skála. 
Áhersla 2020:  Hefja viðræður við hagsmunaaðila um framtíð golfskála eða fjölnota húsnæðis á Hlíðarenda. Skipta um borð og stóla í núverandi skála.

Inniaðstaða til þjálfunar
Inniaðstaðan er í Borgarflöt 2a. Verulegar breytingar hafa orðið á golfþjálfun og golfiðkun undanfarin ár.  Golf er iðkað allt árið með tilkomu golfherma sem gegna lykilhlutverki í að veita endurgjöf sem nauðsynleg er fyrir framfarir.  Golfhermar taka upp sveiflu og veita mikilvægar upplýsingar um sveifluna.  Hermarnir gera einnig kleift að senda gögn til PGA þjálfara til greiningar.  Til að GSS sé í takt við tímann í golfþjálfun er nauðsynlegt að fjárfesta í golfhermi.
Áhersla árið 2020:  Leitað verður styrkja til að fjármagna kaup á Trackman golfhermi.  
Inniæfingar/námskeið fyrir fullorðna í febrúar – mars: „Æfum saman“.

Hlíðarendavöllur
Hlíðarendavöllur fær einróma lof þeirra sem hann sækja.  Staðsetning vallarins er góð, í göngufæri frá íbúðabyggð og tjaldstæðum bæjarins sem hefur marga augljósa kosti.  Völlurinn er stór, á um 29 hektara svæði.  Það krefst vinnu að viðhalda vellinum og bæta.  Sett hefur verið fram 5 ára áætlun um endurbætur á vellinum þar sem margir liðir koma til framkvæmda á árinu 2020. 
Áherslur næstu ára: Sjá útfærslu í handbók.

Categories: Félagsstarf

Nýtt vallarmet Arnars Geirs

Arnar Geir Hjartarson setti nýtt vallarmet á Hlíðarendavelli þegar hann spilaði á 67 höggum eða 5 höggum undir pari vallarins. Vallarmetið setti hann á miðvikudagsmóti Kaffi Króks 7. ágúst þrátt fyrir kulda og nokkurn vind. 

Arnar Geir, sem hefur verið að spilað vel undanfarnar vikur, fékk alls sjö fugla og tvo skolla og kom því í hús á 67 höggum. Búið er að innramma skorkortið og hengja upp í golfskálanum.

Aðrir golfarar stóðu sig flestir vel í mótinu og létu kuldann ekki bíta á sig enda sjóðheitir í sveiflunni. 

Categories: Afreksstarf Mótanefnd