Flokkur: Óflokkað

Íþróttatengd ferðaþjónusta


Ferðamennska hefur farið vaxandi á Íslandi undanfarin ár en nú hefur veira sett strik í reikninginn.  Líklegt má telja að erlendir ferðamenn verði fátíðir gestir í sumar.  Aftur á móti binda aðilar í ferðaþjónustu vonir við að Íslendingar verði duglegir að ferðast innanlands. Fegurð Skagafjarðar heillar hvern þann sem sækir fjörðinn heim.  Í Skagafirði stendur ferðamönnum margt til boða. Hér er náttúrufegurð og fjölbreytt líf manna og dýra sem njóta má jafnt sumar sem vetur. Skagfirðingar eru þekktir fyrir fjölbreytt menningarlíf og sagan drýpur af hverju strái. Veitingastaðir eru góðir og gistimöguleikar margir og spennandi. 

Tækifæri
Mikilvægt er að ferðamönnum standi fjölbreytt afþreying til boða.  Íþróttatengd ferðamennska fer vaxandi og þar eru tækifæri sem nýta má betur.  Í Skagafirði er mikil áhersla á íþróttir, enda erum við heilsueflandi samfélag þar sem lögð er áhersla á hreyfingu fólks á öllum aldri.  Golf er næst vinsælust íþrótta á Íslandi samkvæmt iðkendatölum frá ÍSÍ, knattspyrnan trónir á toppnum.  Í aldurshópnum 30+ hefur golfið þó vinninginn. Kylfingar taka með sér golfsettin þegar ferðast er um landið. Sumir skipuleggja ferðalagið út frá golfvöllum.  Í því er fólgið tækifæri fyrir golfklúbbinn, sveitarfélagið og aðra aðila í ferðaþjónustu í Skagafirði. Aðstæður núna eru sérstakar og líklegt að kylfingar verði óvenju duglegir að ferðast innanlands.

Paradís á Nöfunum
Hlíðarendavöllur er Paradís á Nöfunum.  Útsýni er inn og út fjörðinn með fagra fjallasýn.  Dýrahljóð setja sinn ljóma á völlinn.  Fuglarnir syngja, en kannski ekki alltaf þeir fuglar sem kylfingar vilja að syngi.  Ég hef nú ekki hitt hanann sem galar reglulega þegar ég er að spila, en mikið óskaplega þykir mér vænt um hann.
Völlurinn er þekktur fyrir góða umhirðu og skemmtilegar brautir.  Kylfingar bera honum vel söguna. Völlurinn er líka vinsæll meðal útivistarfólks, í gönguferðum jafnt sumar sem vetur.  Golfskálinn er félagsaðstaða GSS og afdrep fyrir börn og unglinga milli æfinga.  Í skálanum koma kylfingar saman þegar mót eru haldin.  Skálinn er farinn að láta á sjá og kominn tími á endurbætur.  Ýmsir hafa rætt að skálann megi nýta betur, einkum að vetrarlagi.  Draumur minn er sá að sveitarfélagið reisi fjölnota hús á Hlíðarenda sem nýta má allt árið fyrir ýmis félög og starfsemi.

A close up of a lush green field

Description automatically generated
Paradís á Nöfunum. Mynd Hjalti Árnason

Skagafjörður – áfangastaður kylfinga
Við í Golfklúbbi Skagafjarðar (GSS) leggjum okkar af mörkum til að fjölga ferðamönnum í Skagafirði.  Við bjóðum upp á fjölda móta fyrir börn og fullorðna þar sem við fáum gesti víðs vegar að.  Konur í GSS standa fyrir árlegu golfmóti sem nýtur mikilla vinsælda.  Golfskálinn er opinn júní til ágúst og völlinn hefur verið hægt að spila í 5-6 mánuði á ári undanfarin ár.  Í vetur hefur GSS eignast nýja vinaklúbba um land allt, en félagsmenn þeirra fá afslátt þegar þeir spila hjá okkur og gagnkvæmt.  Við gerum okkur vonir um að kylfingar vinaklúbba muni heimsækja Skagafjörð í auknum mæli á komandi árum til að glíma við völlinn fagra og njóta alls hins góða sem Skagafjörður hefur upp á að bjóða.  Skagafjörður er áfangastaður kylfinga. 

50 ára afmæli – hlýðum Víði

GSS fagnar 50 ára afmæli á árinu.  Við munum að sjálfsögðu halda upp á það með ýmsum hætti, s.s. afmælisriti, afmælismóti og afmælishófi, þó þannig að allir hlýði Víði (sem er liðtækur kylfingur). Við höfum áhuga á að fjölga í góðum hópi og bjóðum nýliða velkomna.  Fram undan er nýliðanámskeið sem hefst væntanlega í byrjun júní og verður auglýst í Sjónhorni.  Nánari upplýsingar veitir formaður nýliðanefndar, Dagbjört Rós (dagbjort79@live.com).

Starf GSS byggist að miklu leyti á sjálfboðavinnu.  Við njótum velvilja sveitarfélagsins og fyrirtækja í Skagafirði. Fyrir það þökkum við kærlega. Án stuðnings fyrirtækja og sjálfboðavinnu félagsmanna væri starfið óhugsandi.

Þegar þetta er skrifað er útlit fyrir að golf megi stunda með nokkuð hefðbundnum hætti í sumar. Við í GSS erum því bjartsýn og hlökkum til starfsins.

Kristján Bjarni Halldórsson, formaður GSS

Categories: Óflokkað

GSS 50 ára 2020

Golfklúbbur Skagafjarðar verður 50 ára árið 2020.  Við viljum sýna okkar bestu hliðar á afmælisári og ýmislegt er á döfinni.  Meðal annars má nefna:

  • Aukin áhersla á barna- og unglingastarf. Á sumrin er æft virka daga í tveimur aldurflokkum og á veturna (janúar – apríl) er æft inni á Flötinni, inniaðstöðu GSS. Við munum halda þessu starfi áfram en viljum bæta í með aukinni aðkomu PGA þjálfara.

  • Útgáfa 50 ára afmælisrits.  Í afmælisritinu verða viðtöl við félagsmenn, saga klúbbsins verður rakin og logo styrktaraðila verða áberandi.  Ritinu verður dreift til félagsmanna, fyrirtækja og stofnana í Skagafirði, auk þess sem ritiið verður gert aðgengilegt rafrænt á heimasíðu okkar og vefsíðunni golf.is sem allir golfarar á Íslandi heimsækja reglulega. 

  • Öflugt mótahald.  Mótahald golfklúbbsins er blómlegt en GSS stóð fyrir 36 golfmótum árið 2019.  Flest þessara móta eru haldin í samstarfi við fyrirtæki og bera heiti fyrirtækisins sem styrkir mótið.  Á afmælisári ætlum við að halda áfram góðu mótastarfi og bæta um betur með veglegu afmælismóti.

  • Endurbætur á vellinum.  Góður golfvöllur er grunnurinn að góðu starfi.  Við erum stolt af vellinum okkar sem er í fremstu röð 9 holu golfvalla á Íslandi.  Við viljum vera í fremstu röð áfram en til þess þarfnast völlurinn stöðugs viðhalds og endurbóta.  Vallarnefnd GSS hefur sett fram metnaðarfulla áætlun um endurbætur vallarins til næstu ára þar sem margt mun koma til framkvæmd á afmælisári 2020.

  • Bætt aðstaða í golfskála.  Golfskálinn er vettvangur þar sem félagar koma saman að loknum góðum hring, þar sem börn og unglingar hafa aðstöðu fyrir og eftir æfingar, þar sem ferðagolfar setjast niður og slaka á í fögru umhverfi og síðast en ekki síst er golfskálinn nauðsynlegur fyrir mótahald.  Skálinn er farinn að láta á sjá og nauðsynlegt að sinna viðhaldi hans.  Þá er orðið löngu tímabært að endurnýja húsgögn.

  • Fjölgun félaga.  Nýliðanámskeið hafa verið vel heppnuð og leitt til fjölgunar félaga í klúbbnum.  Við viljum gera enn betur.  Stefnt er að sérstakri kynningu meðal nýbúa, eldri borgurum verður boðið upp á púttnámskeið og sérstakar kynningar verða í byggðakjörnum utan Sauðárkróks.  Nafni klúbbsins var breytt í nóvember 2019 og heitir hann nú Golfklúbbur Skagfirðinga og leggjum við með því áherslu á að klúbburinn er fyrir alla íbúa Skagafjarðar.

  • Nútímaþjálfun.  Golfþjálfun hefur tekið miklum framförum undanfarin ár.  Þar munar mest um framfarir í golfhermum sem gera kleift að æfa golf allt árið með nákvæmum upplýsingum um boltaflug og sveiflu.  Sífellt fleiri golfklúbbar hafa notfært sér tækniframfarirnar og fjárfest í fullkomnum golfhermum (Trackman).  Við viljum ekki vera eftirbátar öllu lengur og viljum fjárfesta í slíkum hermi.  Nýr golfhermir mun hafa í för með sér betri þjálfun fyrir börn, unglinga og fullorðna félagsmenn GSS.

Starf GSS er fjölþætt og fer vaxandi.  Við viljum nýta tækifærin sem eru fólgin í vaxandi vinsældum golfs á Íslandi, aukinni áherslu á heilsueflingu og hlýnandi veðurfari.  Við sjáum tækifæri til að efla starfsemi GSS á afmælisári með hjálp góðra fyrirtækja.  Við viljum einnig vinna með fyrirtækjum að því að brjóta upp starfið á starfsmannadögum eða skemmtidögum, s.s. með púttmóti eða golfmóti á Hlíðarendavelli eða í inniaðstöðu.  

Categories: Óflokkað